ورشة عمل : اداب التواصل

حضرت قبل فترة ورشة عمل كانت متطلب في احد المواد .. تختص ورشة العمل في تهيئة الطلاب لآداب التواصل عند :

• المقابلات الشخصية في حالة قدّم احدهم لطلب وظيفة ..
• وايضاً عندما تذهب لعشاء عمل او عشاء رسمي.

حقيقةً ما توقعت ان ورشة العمل هذي راح تفيدني بشكل كبير .. كانت تستحق كل دقيقة قضيتها هناك ..

كان من متطلبات الحضور لهذه الورشة ان حضورك يكون رسمي وكأنك حاضر للتقديم على وظيفة و لعشاء العمل يعني لبس رسمي وتعرف بنفسك بشكل رسمي وتسلم بطاقتك الشخصية لكل شخص تتعرف عليه بورشة العمل ( الجامعة كانوا مضبطين كل شيء) ..

اولاً , قاموا بتوزيعنا لمجموعات .. ويقوم احد المختصين (دكاترة) كل في مجاله ( اللي مختص في عمل مقابلات شخصية, واللي مختص في التعليم, واللي مختص في الموارد البشرية) بإلقاء محاضرة في تخصصه لمدة عشر دقائق على كل مجموعة  ..

مرّت علينا إمراة كبيرة في السن .. وكانت محاضرتها عن المظهر الخارجي للمتقدم للوظيفة .. اللبس وكيف لازم يكون بسيط ولا فيه تكلف .. مثال, ما ينفع تلبس شي فيه زركشه  وشي ملفت للنظر .. لازم تكون الألوان متوافقه ومن الافضل ان تميل للألوان الداكنه الهادئه .. تحدثت عن قصات الشعر وانه افضل انه شعرك يكون مرتب ولا تجي مقدم على وظيفة انت وكشتك كأنك اسبوع الشجرة ! ايضاً الاظافر تكون مقصوصة ..

انتهت العشرة دقائق وراحت العجيَز .. وجتنا وحده ثانية تقول انها تقوم بمقابلات شخصية دائماً ويمر عليها اشكال والوان من الناس .. قامت تتميلح شوي مع البنات اللي بالمجموعة انتي لبسك زين وانتي مدري وشو لدرجة اني نسيت وش تقول  .. انتهى وقتها

وجتنا امراة اخرى .. كانت افضل وحده مرت علينا في نظري .. لأنها خلتنا نشارك معها بحيث اننا ناخذ ونعطي بالكلام .. تقول في المقابلات الشخصية مهما كانت الظروف فيها لا يحق لأحد ان يسأل عن اسأله شخصية او دينية تخص مقدم الوظيفة او المتقدم لها .. يعني نقول مثلاً هذا فلان الفلاني قدم على وظيفة .. في المقابلة الشخصية سألوه وش ترجعون انتم يا الفلاني !! او وش انتمائك الديني .. هذا ممنوع وممكن يحاسب عليه مقدم الوظيفة في امريكا … ايضاً شيء اخر العنصرية في العمر ممنوعة اذا كان المتقدم يملك المقومات المطلوبة وقادر انه يعمل, إذاً لازم تسوي معه مقابلة شخصية ومنها تحدد ولكن ترفضه بسبب عمره فهذا غير مقبول وفيها مساءلات ..ايضاً, شرحت لنا كيف نقوم بتعريف انفسنا بالطريقة الرسمية وهي السلام ومصافحة اليد والتعريف بالاسم.

بعد هذا كله قمنا نطبق فعلياً. كل شخص لازم يخلص بطاقاته الشخصية بحيث انه يحاول يتعرف على قدر ممكن من الناس ويعرفهم بنفسه ويسلم لهم بطاقته الشخصية. فعلاً, تعرفت على ناس كثير وكانوا طلاب ودكاترة و ممثلين شركات.

انتهى وقت التعارف … وجاء وقت العشاء

يتبع…